Gisumite ni Atty. Levi Baligod sa Office of the Ombudsman ang notarized affidavits sa 18 ka nagpakilalang kanhi sundalo nga nag-akusar sa pipila ka opisyal sa gobyerno sa pagdawat og milyon-milyong pisong kwarta.
Sumala kang Baligod, duha sa mga mipirma kanhi miyembro sa Philippine Army samtang 16 gikan sa Philippine Marines. Giingon nga sila ang nagdala og mga maleta nga puno sa kuwarta ngadto sa balay sa pipila ka opisyal.
Gi-refer ang kaso sa Ombudsman aron maimbestigahan kon adunay prima facie evidence sa paglapas sa Republic Act No. 3019 ug Republic Act No. 6713, ilabi na sa giingong wala maapil sa SALN ang nadawat umanong kantidad.
Posible usab nga masuta ang malversation ug bribery kon makaplagan ang igo nga basehan sa imbestigasyon. Sa karon, naghulat ang kampo sa sunod nga aksyon sa Ombudsman.