Nadisamaya si House Deputy Majority Leader ug Appropriations Vice Chair Zia Alonto Adiong sa wala pagtambong ni Vice President Sara Duterte sa plenary debate sa Kamara bahin sa 2026 budget sa Office of the Vice President (OVP) nga nagkantidad sa ₱902.8 milyon.
Sumala ni Adiong, importante ang aktibong presensya sa mga ahensya sa budget deliberation, labi na kung adunay gipangayo nga dugang pondo. Ang OVP nangayo og dugang ₱200 milyon gikan sa kasamtangang ₱733 milyon apan wala matino nga detalye sa presentasyon kung asa kini igamit.
Gibutyag pa sa kongresista nga responsibilidad sa lider sa ahensya ang pagdepensa sa budget proposal lakip ang paglatid og klaro nga plano sa paggasto. Gidugang pa niini nga mas maayo nga personal nga madungog sa Kongreso ang tubag gikan mismo sa Bise Presidente.