Nanawagan karon ang grupong ACT Teachers Party-list og dinaliang repaso sa sistema sa evaluation sa mga magtutudlo. Kini human sa makapasubo nga balita bahin sa usa ka public high school teacher sa Muntinlupa nga nakabsan sa kinabuhi samtang gipahigayon ang usa ka classroom observation.
Base sa mga report, ang biktima nailhan nga si Agnes Buenaflor, 58-anyos, kinsa kalit lang nga natumba o nukuyapan samtang ginasusi ang iyang klase sa Pedro E. Diaz High School.
Bisan pa man gidala dayon kini sa ospital, gideklara kining patay na. Tungod sa maong insidente, giawhag ni France Castro, ang kanhi representanti sa ACT Teachers, ang Department of Education (DepEd) nga usbon ang Results-Based Performance Management System (RPMS).
Matud pa, ang classroom observation kinahanglan mahimong suporta sa mga magtutudlo ug dili mahimong silot nga maghatag og sobra nga stress o kabug-at sa ilang trabaho. Gawas sa pag-repaso sa evaluation system, gihangyo usab sa grupo ang regular nga health check-ups para sa mental ug physical nga kahimsog sa mga magtutudlo.
Sa pagkakaron, nagpaabot usab ang maong grupo og pinansyal nga tabang para sa pamilya sa namatay nga magtutudlo samtang nagpadayon ang panawagan ngadto sa gobyerno nga hatagan og dugang benepisyo ang mga guro.