Nakadugang sa problema sa mga residente sa mga apektadong lugar, ang subling pagbuto sa baga nga abo gikan sa Kanlaon Volcano gahapong adlawa, Biyernes sa buntag, Pebrero 27, 2026.
Ang nasangpit nga plume nagpakita nga aktibo gihapon ang bulkan human sa miaging kasarangang pagbuto kaniadtong Huwebes sa gabii.
Ang PHIVOLCS nagpadayon sa pagmonitor sa kahimtang sa bulkan aron masiguro ang kaluwasan sa mga komunidad sa palibot.
Gitambagan usab ang publiko nga magpabiling alerto ug mosunod sa mga advisories nga gipagawas sa mga lokal nga kagamhanan ug ahensya sa gobyerno.
Ang mga otoridad padayon nga nag-monitor alang sa posible nga dugang nga kalihokan sa bulkan samtang nagpahinumdom sa mga residente nga likayan ang mga peligrosong mga lugar sulod sa Permanent Danger Zone.
Miabot na usab ang abo sa La Castellana, La Carlota City, San Enrique, Pontevedra, Hinigaran, Isabela, Kabankalan City, San Carlos City, Himamaylan City, Binalbagan, ug Cauayan, Negros Occidental.
Samtang sa mga lugar sa Bago City ug Moises Padilla, nanimaho ang sulfur sa pipila ka mga barangay, ug ang uban mibakwit na sa mga panimalay partikular na sa La Carlota ug La Castellana.
Sa sa pakighinabi sa Star FM Bacolod kay Jane V. Caña, magtutudlo sa Caliling Elementary School sa Cauayan, Negros Occidental, gipadayag niini nga karon lamang kini nakasinati og susumang sitwasyon sa lugar niini.
Matud pa, nga sa pamati niini mihinay na ang amihan hinungdan nga nakaabot kanila ang ashfall.