Gisugdan na pre-termination notice sa joint venture contract tali sa Malaybalay City Water District (MCWD) ug PrimeWater tungod sa kapakyasan sa pagtuman sa daghang kasabutan sa kontrata.
Sa eksklusibong pakighinabi sa Bombo Radyo Malaybalay kang Engr. Nolito Binahon, General Manager sa MCWD, iyang gipasabot nga ang kasamtangang minor projects ug repairs nga gihimo sa PrimeWater dili pa makatubag sa tanang problema nga nasinati sa suplay sa tubig sa syudad.
Matud ni Binahon, ang pre-termination notice gipagawas niadtong Agosto 26, ug sa bulan sa Septyembre misugod ang 90 ka adlaw nga pre-termination period, nga gikaingong matapos sa ikaduhang semana sa Disyembre ning tuiga.
Apan giklaro ni Binahon, nga ang pre-termination dili pasabot nga insigida nga undangon ang tanang operasyon, gumikan kini ipailawom una sa evaluation ug negosasyon pagkahuman sa 90 ka adlaw.Â
Gibutyag usab ni Binahon, nga daghang performance indicators ang wala natuman sa PrimeWater, ug kadaghanan niini wala nakaabot sa katunga sa gipahimutang nga target sa kontrata.
Dugang pa niini, hangtod karon wala pa’y opisyal nga komunikasyon nga nadawat ang MCWD gikan sa PrimeWater alang sa pormal nga negosasyon kabahin sa pre-termination.