Natala sa kapulisan sa San Fernando, Bukidnon ang siyam (9) ka kaso sa pagpanglugos, hinungdan aron mas hugtan sa mga otoridad ug lokal nga panggamhanan ang ilang kampanya batok sa pagpang-abuso sa kababayen-an ug kabataan.
Sumala ni Police Staff Sergeant PSSg. Joy Jane Berlin, Women and Children Protection Desk (WCPD) Assistant Investigator sa San Fernando Municipal Police Station, upat sa maong kaso ang bag-ong natala samtang lima niini late-reported. Tungod niini, nagpadayon ang kapulisan, kauban ang Municipal Social Welfare and Development Office (MSWDO), sa paglunsad sa mga programa ug lecture sa mga tunghaan ug komunidad aron mapalambo ang kahibalo ug pagpanalipod batok sa mga porma sa pag-abuso.
Gipahigayon usab sa mga otoridad ang pag-apil sa mothers class activities sa municipal office aron maedukar ang mga inahan ug kababayen-an sa hustong pagbantay sa ilang mga anak ug likayan ang mga insidente sa pagpanglugos.
Nanawagan si Berlin sa mga ginikanan nga magdoble bantay sa ilang mga anak, ug siguruhong ma-monitor ang kahimtang niini bisan sa eskwelahan o sa komunidad aron mapugngan ang mga krimen batok sa kabataan ug kababayen-an.