Gi-aghat sa 8th Infantry Battalion ang katawhan sa pagdonar ug dugo tungod kay kini makatabang dili lamang sa uban kon dili apil usab sa kaugalingon.
Kini ang pamahayag ni SGT Jhelia Ann Palomeno sa 8th Infantry Battalion atol sa pakighinabi sa Bombo Radyo Malaybalay diin gipasabot niini nga ang pagdonar ug dugo usa ka klase sa pagtabang sa kaugalingon ingon man sa ubang tawo.
Saysay niini malipayon ang ilang buhatan sa dihang nakadawat sila ug imbitasyon alang sa umaabot nga Dugong Bombo 2025 nga ipahigayon sa Bukidnon State University karong Nobyembre 15, 2025.
Dugang pa niini, sukad pa sa iyang pagkolehiyo hangtod karon, pito (7) na ka beses siya nakadonar ug dugo.
Matud pa niini dako kinig tabang aron mapagamay ang posibilidad sa heart disease. Tungod niini, gi-awhag ni SGt. Palomeno ang katawhan nga magdonar ug dugo aron makatabang sa kaugalingon ug sa mga nanginahanglan.