Nakadawat og pagdayeg ug nagsilbing dakong inspirasyon sa mga atleta ang 88-anyos nga si Ploutarchos Pourliakas human kini malampusong nataposa ang Athens Marathon karong tuiga.
Gipamatud-an ni Pourliakas nga ang edad dili babag sa determinasyon human kini makompleto ang ika-12 nga pagsalmot sa maong prestihiyosong lumba. Ang Athens Marathon, nga nailhan usab nga “The Authentic,” gihimo matag tuig subay sa rota nga gidagan sa mensahero nga si Phiedippides, 2,500 ka tuig na ang milabay.
Sa pagkakaron, ang maong ruta gikan sa Tomb of Marathon paingon sa Panathenaic Stadium nahimo nang simbolo sa kalig-on ug dedikasyon alang sa mga marathoners sa tibuok kalibutan.
Bisan pa sa iyang pangidaron, mas gipaspasan pa ni Pourliakas ang dagan karong tuiga, diin narekord kini og 42.195 kilometros sulod lamang sa 5 ka oras ug 31 ka minuto.
Kini nga record mas paspas og 18 ka minuto kon itandi sa iyang narekord sa miaging tuig.