Muabot na sa kapin o kulang 270 ka kanhing myembro sa walhong grupong New People’s Army kon NPA ang mitahan na balik sa sabakan sa gobyerno ug kasamtangang gipailawom sa Enhanced Comprehensive Local Integration Program kon E-CLIP.
Kini base sa eksklusibong pakighinabi sa Bombo Radyo Malaybalay kang CPT. Ariel O. Asentista, Civil Military Operations Officer sa 89th Infantry Battalion sa Philippine Army.
Matud ni CPT. Asentista, padayon pa ang mga interbensyon ilawom sa E-CLIP alang sa mga nagsurrender, lakip na ang livelihood assistance, financial assistance, ug uban pang porma sa suporta aron masiguro ang malinawong reintegrasyon sa komunidad.
Gbutyag usab niini, nga adunay siyam ka mga lugar ang sakop sa area of responsibility sa 89th Infantry Battalion, ang nadeklara na nga insurgency-free nga naglakip sa San Fernando, Valencia City, Don Carlos, Dangcagan, Kadingilan, Kitaotao, Kibawe, ug Quezon sa lalawigan sa Bukidnon.
Sumala sa usab opisyal, wala’y kasamtangang hulga sa seguridad sa Bukidnon.
Nunot niini, giawhag sa 89th Infantry Battalion ang publiko nga magpadayon sa kooperasyon sa lokal nga kagamhanan ug sa kasundalohan, hilabi na sa paghatag og kasayuran nga makatabang sa pagmintinar sa kalinaw ug kahusay.