Detinado na karon sa New Quezon City Jail sa Payatas ang walo ka kanhing opisyal sa Department of Public Works and Highways (DPWH)-MIMAROPA alang sa ilang arraignment.
Ang maong pasilidad gitudlo nga detention facility alang sa mga suspetsado sa flood control corruption.
Kini nga mga indibidwal mao ang nag-una nga gipasakaan og kaso kalabot sa nabutyag nga flood control scandal, diin naglangkob nila Gerald Pacanan, Gene Ryan Altea, Ruben Santos, Dominic Serrano, Juliet Calvo, Dennis Abagon, Montrexis Tamayo, ug Lerma Cayco.
Giatubang nila ang kaso nga malversation kabahin sa maanomalyang flood control project sa Naujan, Oriental Mindoro.
Base sa record sa DPWH, ang proyekto nga nagkantidad og P289 milyon adunay pipila ka bahin nga gi-report nga 100% completed apan wala makita, samtang ang uban napamatud-ang substandard.
Nasuta usab sa mga imbestigador sa gobyerno nga pipila sa mga dokumentong gigamit sa proyekto peke.
Lakip sa mga akusado ang grupo nga giisyuhan og warrant of arrest kauban ni kanhing House Appropriations Committee Chairman Zaldy Co ug ubang opisyal sa Sunwest Corporation.
Diin gikaingong contractor sa proyekto nga ubos gihapon sa iyang pagpanag-iya niadtong panahona.