Gipamatud-an sa usa ka lola didto sa probinsya sa Cagayan nga ang pangandoy walay gipiling edad ug dili babag ang katigulangon aron makab-ot ang edukasyon.
Nahimong sentro sa pagdayeg ug inspirasyon si Lola Genova Andaya human siya malampusong nigradwar sa Senior High School sa edad nga 78 anyos.
Mapasalamaton ug mapahiyumon nga gidawat ni Lola Genova ang iyang diploma sa Magapit National High School nga nahimutang sa lungsod sa Lal-lo, Cagayan.
Bisan pa sa iyang pangedaron, wala kini nahimong babag sa iyang determinasyon nga mahuman ang iyang pagtuon. Sumala pa, ang iyang gipakitang kugi nagsilbing lig-on nga mensahe ngadto sa mga kabatan-onan karon—nga walay pulong nga “ulahi na ang tanan” kon ang pag-eskwela ug pagkab-ot sa mga damgo ang hisgutan.
Sa pagkakaron, ang istorya ni Lola Genova niani og daghang positibong komento gikan sa mga netizens kinsa natandog sa iyang gipakitang kaisog ug dedikasyon.