Nadakpan ang pito ka mga persona sa usa ka operasyon batok sa illegal nga sugal nga gipahigayon kagahapong adlawa, Abril 2, 2026, takna alas 2:35 sa hapon sa Purok 1, Dagumbaan, Maramag, Bukidnon.
Sumala sa taho ang operasyon gipangulohan sa mga kapulisan sa Maramag Municipal Police Station ubos sa liderato ni PLTCOL Alexander E. Eugenio, Chief of Police, uban ang 2nd Bukidnon Provincial Mobile Force Company sa koordinasyon sa Bukidnon Provincial Intelligence Unit.
Ang mga nadakpan naglakip sa pito ka mga indibidwal nga may edad 40, 47, 44, 42, 48, 48, ug 77 anyos, nga tanan residente sa nagkalain-laing purok sa Barangay Dagumbaan, Maramag.
Narekober sa lugar sa operasyon ang duha ka set sa baraha nga may tag-52 ka piraso matag set, ug kantidad nga siyam ka gatus kwarenta pesos (Php 940.00) nga gituohang pusta sa maong illegal nga dula.
Ang mga nadakpan ug ang mga nakompiska nga ebidensya gidala sa Maramag Municipal Police Station alang sa hustong dokumentasyon ug disposisyon.
Nag-andam na ang kapulisan og kaso batok sa mga suspetsado tungod sa paglapas sa Presidential Decree No. 1602 o ang balaod batok sa illegal nga sugal.