Nasikop sa nagkadaiyang yunit sa Bukidnon Police Provincial Office ang pito ka suspetsado sa ilegal nga droga sa gipahigayon nga serye sa anti-illegal drug buy-bust operations niadtong Marso 15 hangtod 17, tuig 2026.
Ang maong mga operasyon gipahigayon sa mga lungsod sa Damulog, Quezon, Kitaotao, Kadingilan, Talakag, Don Carlos, ug Dangcagan ubos sa pagdumala ni PCOL Oliver Sotto Navales.
Kadaghanan sa mga dinakpan giila nga mga “newly identified drug personalities” kinsa nakuhaan og nagkadaiyang pakete sa gituohang shabu, buy-bust money, ug uban pang mga kagamitan.
Subay sa report, ang kinatibuk-ang kantidad sa nasakmit nga ilegal nga droga nikabat sa kapin Php33,690.00 base sa standard drug price.
Lakip usab sa mga nakumpiska ang pipila ka unit sa motorsiklo ug cellular phones nga gigamit sa ilang ilegal nga aktibidad. Sa pagkakaron, giandam na ang mga kasong paglapas sa RA 9165 o Comprehensive Dangerous Drugs Act of 2002 batok sa mga suspetsado nga ipasaka sa buhatan sa Provincial Prosecutor ning dakbayan sa Malaybalay.