Mag-atubang og kasong estafa ang usa ka 68-anyos nga babaye human kini nasikop sa mga otoridad pinaagi sa usa ka warrant of arrest niadtong Marso 30, 2026, sa may Purok 2, Barangay Natulongan, Kibawe, Bukidnon.
Giila ang suspetsado nga si Elizabeth Longgan Alivio, biyuda ug residente sa maong dapit.
Ang pagdakop kaniya gipahigayon sa mga personahe sa Kadingilan Municipal Police Station sa pagpangulo ni PCPT Larry Tecson Malhin, inabagan sa 2nd Bukidnon PMFC, 1003rd Maneuver Company sa RMFB 10, ug Provincial Intelligence Unit.
Nasikop si Alivio base sa gahum sa warrant of arrest alang sa kasong Violation of Estafa ubos sa Criminal Case Number 26989-15 nga gi-isyu pa niadtong Hulyo 30, 2015, diin walay girekomendang piyansa alang sa iyang temporaryong kagawasan.
Sa pagkakaron, ang dinakpan anaa na sa kustodiya sa Kadingilan MPS alang sa saktong dokumentasyon ug disposisyon sa korte.