Mikabat sa hapit 650,000 ka mga sakop sa Iglesia Ni Cristo (INC) ang mitambong sa unang adlaw sa “Transparency for a Better Democracy” rally nga gipahigayon sa Quirino Grandstand kagabii, adlawng Dominggo, Nobiyembre 16, 2025.
Ang dakong ihap sa mitambong nagpakita sa lig-on nga suporta sa mga miyembro sa panawagan sa transparency ug mas limpyo nga pamalaod, samtang nagpabilin usab nga hapsay ug malinawon ang kalihokan ubos sa hugot nga seguridad ug koordinasyon sa lokal nga kagamhanan ug kapulisan.
Kabahin niini, giisip sa Department of the Interior and Local Government (DILG) nga generally peaceful ang unang adlaw sa rally nga gi-organisa sa Iglesia Ni Cristo (INC).
Matud ni Interior Secretary Jonvic Remulla, andam ang gobyerno alang sa tulo ka adlaw nga rally lakip na ang posibilidad sa mga destabilizers.
Kuyog sa Kalihim sa pagbisita sa pipila ka lugar sa pagtigum mao si Philippine National Police (PNP) chief Lt. Gen. Jose Melencio Nartatez Jr. ug National Capital Region Police Office (NCRPO) director Maj. Gen. Anthony Aberin.
Gidugang pa ni Remulla nga gituman sa mga tigdumala sa INC ang ilang saad diin pagapangapuluhan nga malinawon ang maong protestang kalihukan.
Gisiguro usab sa kalihim nga dili mausab ang lebel sa seguridad hangtod sa ikaduhang adlaw ug sa katapusan nga adlaw sa rally sa INC.
Samtang sa pagkakaron anaa sa sa kapin 150,000 ka indibidwal ang misalmot karon sa gipahigayon nga rally alang sa ikaduhang adlaw sa maong kalihukan.