Nagpaalim karon sa tambalanan ang usa ka 60-anyos nga lalaki human kini gipusil sa wala mailhing suspisado sa Purok 2, Barangay Bangahan, Pangantucan, Bukidnon, sayo sa buntag niadtong Marso 29, 2026.
Nailhan ang biktima nga usa ka mobile sound system operator ug residente sa Quezon, Bukidnon. Base sa imbestigasyon sa mga otoridad, nahitabo ang insidente pasado alas-4:30 sa buntag samtang ang biktima nag-empake na sa iyang mga kagamitan human sa usa ka disco sa maong barangay.
Sa dihang padulong na unta ang biktima sa iyang sakyanan, nakadungog ang iyang mga kauban og tulo ka sunod-sunod nga buto sa pusil. Nakita na lamang ang biktima nga naghigda ug duna’y daghang samad-pinusilan sa lawas, samtang usa ka motorsiklo ang namatikdan nga paspas nga misutoy paingon sa kasadpang bahin.
Daling gidala ang biktima sa balay tambalanan samtang ang mga sakop sa Pangantucan Municipal Police Station narekober ang duha ka basiyo sa .45 caliber nga armas gikan sa crime scene.
Sa pagkakaron, padayon ang gihimong pakisusi sa kapulisan kauban ang Bukidnon Forensic Unit aron mailhan ang suspisado ug masuta ang motibo sa maong pagpangatake. Nanawagan usab ang mga otoridad sa publiko nga makig-alayon ug mohatag og impormasyon aron daling masulbad ang maong krimen.