Gikumpirma sa Ministry of Interior sa Qatar nga unom ka tawo ang nakabsan sa kinabuhi human nihagsa ang usa ka helicopter sa kadagatan nga sakop sa Qatar.
Sumala sa mga awtoridad, unom sa pito ka mga sakay sa helicopter ang narekober na ang patay’ng lawas sa search and rescue team, samtang nagpadayon pa ang hugot nga operasyon aron pangitaon ang usa pa nga nahanaw.
Una nang gipahayag sa Ministry of Defense sa Qatar nga posibleng adunay “technical failure” o aberya sa makina ang helicopter. Giklaro usab nila nga walay timailhan nga giatake ang aircraft, ug wala pa matino kung ang maong helicopter iya ba sa militar o sa usa ka pribadong indibidwal.
Sa pagkakaron, mao kini ang labing unang gitaho nga insidente sa pagkahagsa sa ayroplano o helicopter sa Qatar taliwala sa nagpadayon nga tensyon ug gubat sa Middle East.
Nagpadayon pa ang imbestigasyon sa maong trahedya samtang nagpaabot pa ang tanan sa dugang detalye gikan sa mga opisyal.