Nagpaabot si Vice President Sara Duterte, uban ang kampo ni kanhing Pangulong Rodrigo Roa Duterte, nga adunay klarong aksyon ug kasong ikapasaka batok sa mga opisyal nga nalambigit sa kontrobersyal nga pag-aresto sa kanhi presidente.
Kini nga pamahayag ni VP Sara human gisumite ni Senadora Imee Marcos ang iyang rekomendasyon ngadto sa Office of the Ombudsman, diin gipangayo nga imbestigahan ug kasohan sila Justice Secretary Jesus Crispin “Boying” Remulla, Interior Secretary Jonvic Remulla, PNP Chief Gen. Rommel Marbil, ug CIDG Director Maj. Gen. Nicolas Torre III.
Sumala sa bise presidente, ang ilang panawagan dili lamang para sa hustisya apan para sa pagtul-id sa sayop nga proseso nga ilang gituohang naglambigit sa usa ka politikal nga motibo. Dugang pa ni VP Sara nga ang pagsaka og kaso batok sa mga opisyal magpakita nga buhi pa ang prinsipyo sa accountability sa nasud ug nga walay exemption bisan pa sa taas nga posisyon sa gobyerno.
Gilauman sa kampo ni FPRRD nga ang Ombudsman motrabaho sa hustong paagi aron masuta ang kamatuoran ug ipatuman ang hustisya nga angay alang kang Duterte.