Mokabat 54 ka mga Pilipino sa Israel ang pormal nga nihangyo og repatriation o pagpauli sa nasod taliwala sa nagkagrabe nga tensiyon sa Middle East.
Sumala ni Philippine Ambassador to Israel Aileen Mendiola, gilangkuban kini sa 32 ka mga turista ug 22 ka overseas Filipino workers (OFWs) nga gustong makalingkawas sa nagpadayong kagubot.
Giangkon sa Ambassador nga dakong hagit karon ang pagpagawas kanila tungod kay walay flights nga makasulod o makagawas sa Israel, gawas pa nga sirado usab ang mga land crossing sa maong lugar.
Sa pagkakaron, giuna sa embahada ang pagtabang sa mga stranded nga turista tungod kay wala kini permanenteng mapuy-an, hinungdan nga nakig-alayon na sa Ministry of Tourism sa Israel alang sa dinaliang pagbakwit kanila.
Dugang pa , nahimo usab nga hagit ang pagpauli sa patay’ng lawas sa Pinay caregiver nga si Mary Ann Velasquez de Vera nga nakabsan sa kinabuhi sa Israel.
Matud ni Ambassador Mendiola, imposible pa ang dinaliang pagpauli sa iyang patay’ng sa pagkakaron, apan padayon ang pakig-istorya sa ilang team ngadto sa bana sa biktima nga anaa usab sa Israel ug sa igsoon niini nga anaa sa Qatar aron maplano ang pag-uli sa Pilipinas.
Subay sa datos sa Department of Foreign Affairs (DFA), moabot sa 2.5 milyones ka mga Pilipino ang anaa sa tibuok Middle East, diin ang kinabag-an anaa sa UAE, Saudi Arabia, ug Qatar, samtang duna usab 800 ka mga Pinoy sa Iran.