51-anyos nga lalaki nga nagpayuhot og illegal nga droga, nadakpan sa lungsod sa Lantapan

Nakakustudiya na sa Lantapan Municipal Police Station ang usa ka 51-anyos nga lalaki, kinsa giilang “newly identified” drug personality, human kini nasikop sa gipahigayon nga buy-bust operation sa Purok-4, Barangay Kaatuan, Lantapan, Bukidnon, niadtong Pebrero 28, 2026.

Nakuha gikan sa posisyon sa suspetsado ang duha ka sachet sa gidudahang shabu nga motimbang og 4.88 gramos ug adunay standard drug price nga Php33,184.00.

Lakip sa mga nakumpiskang ebidensya mao ang usa ka pula nga cellphone, usa ka camouflage sling bag, ug usa ka motorsiklo samtang giandam na ang kasong paglapas sa R.A. No. 9165 batok sa dinakpan.