Giduso ni Senator Jinggoy Ejercito Estrada ang Senate Bill No. 1074 nga nagtinguha nga pakunhoran og 50 porsiyento ang bayad o remittance fees sa mga Overseas Filipino Workers (OFWs) sa matag higayon nga magpadala sila og kuwarta sa ilang pamilya sa Pilipinas.
Ubos niini nga sugyot balaodnon, obligahon ang mga bangko ug remittance centers nga mohatag sa maong diskwento bugti sa tax deductions nga ilang madawat gikan sa gobyerno.
Tumong niini nga masiguro nga mas dako ang mapaingoon sa pamilya sa mga OFW kaysa sa mga bayaron sa pagpadala, dungan sa pagpatuman og mas estrikto nga transparency aron malikayan ang mga “hidden charges.”
Gawas sa diskwento, apil usab sa balaodnon ang libreng financial education alang sa mga OFW ug ilang pamilya aron matudloan sila sa hustong pagdumala sa ilang kinitaan ug paglikay sa mga scam.
Ang mga institusyon nga molapas niini mahimong mag-atubang og bug-at nga silot, lakip na ang pagkabilanggo ug dagkong multa.