Mukabat sa 40 ka mga lugar sa Pilipinas ang gipaubos sa state of calamity (SOC) tungod sa kadaot sa miaging bagyong Crising ug sa kasamtangang bagyong Dante, Emong ug sa habagat.
Base sa datos sa National Disaster Risk Reduction and Management Council (NDRRMC), ang gipailalom sa state of calamity naglakip sa 23 ka mga siyudad ug lungsod sa lalawigan sa Cavite ug 17 ka mga lugar sa Metro Manila ug ubang mga probinsiya.
Sa monitoring sa ahensiya, lakip sa gipaubos sa state of calamity ang mga lungsod sama sa Mangaldan ug Umingan sa Pangasinan, Meycauayan, Paombong, Balagtas ug Calumpit sa Bulacan, Masantol sa Pampanga, Paniqui sa Tarlac, Agoncillo sa Batangas, San Mateo, Rodriguez (Montalban) ug Cainta sa Metro Manila, Barrio, Antiza ug Palawan, ug Quezon City.
Gawas niini, pipila usab ka mga siyudad sa Metro Manila sama sa Marikina, Manila ug Las Piñas ang gipailawom usab sa SOC samtang lakip usab ang ubang probinsya sa Ilocos Region sama sa Pangasinan, diin pipila ka mga lugar ang nakasinati og grabeng pagbaha, nga gipaubos usab sa SOC lakip na ang Dagupan City, Calasiao, Lingayen, Malasiqui ug Sta. Barbara ingon man sa dakbayan sa Cebu.
Sa pagkakaron, kapin sa 2.7 milyones ka indibidwal gikan sa kapin 700,000 ka pamilya sa tanang rehiyon sa nasud, gawas sa Eastern Visayas, ang naapektuhan sa mga kalamidad.
Kapin sa 147,000 ka mga indibidwal gikan sa kapin sa 40,000 ka pamilya ang nagpabilin sa mga evacuation centers samtang kapin sa 90,000 ka mga indibidwal gikan sa kapin 23,000 ka mga pamilya ang temporaryong nagpuyo sa ubang mga lugar.
Ang nahisgutang mga lugar adunay natala nga mga insidente sa pagbaha, pagdahili sa yuta, pagkahugno sa mga istruktura, ug mga buhawi.
Ang labing naapektohan ug naigo nga rehiyon mao ang Central Luzon, gisundan sa Negros island region ug Calabarzon.
Ang nagpadayong katalagman sa nasud mikalas na og 12 ka mga kinabuhi samtang walo pa ang nagpabiling missing ug walo ang gikatahong naangol.