Padayon ang operasyon sa kapulisan ug mga rescue teams sa pagpangita sa lima ka mga tawo nga hangtod karon missing human sa kusog nga flash flood nga miigo sa dakbayan sa Valencia tungod sa epekto sa Bagyong Mirasol.
Matud pa ni June Ray Valero, hepe sa City Disaster Risk Reduction and Management Office (CDRRMO), walo ka tawo ang unang natala nga nawagtang atol sa kalit nga pagbaha niadtong Myerkules sa gabei, Septembre 17, 2025
Sa pagkakaron, 4 na ang naplagan nga patay usa niini ang giilang si Larry Labay, principal sa Sugod Integrated High School. Sumala sa imbestigasyon, sakay si Labay ug duha ka kauban sa usa ka sakyanan nga nasangit sa kusog nga agas sa tubig baha diha sa unahan sa ilang gisubay nga dalan.
Napuno sa tubig ug na-anod ang ilang sakyanan, hinungdan sa iyang trahedya nga kamatayon. Gikompirma usab sa CDRRMO nga 398 ka pamilya ang apektado sa maong katalagman. Gisakop niini ang 12 ka balay nga nadaot pagbaha ug posibli pang pa dugangan ang ihap niini. Upat ka sakyanan ang naretrieve nga naanod sa tubig, samtang daghang mga motorsiklo ang nadala usab sa kusog nga tubig.
Saysay pa ni Valero ang mga biktima nagpuyo kilid sa Panlibatuhan Creek nga nagdalag kusog nga tubig gikan sa kabukiran. Basi sa inisyal nga assessment sa mga otoridad, walo ka barangay ang grabe’ng naapektuhan sa flash flood.
Kini mao ang Barangay Poblacion, Tugaya, Lumbo, Mailag, Sugod, Guinoyoran, Bagontaas ug Barobo. Gipanawagan karon sa lokal nga panggamhanan ang kooperasyon sa mga residente ilabi na sa mga dapit nga delikado ug daplin sa sapa nga magpabiling alerto.