Nakabsan sa kinabuhi ang upat ka miyembro sa 2nd Provincial Mobile Force Company (PMFC) human mahulog sa pangpang ang ilang mobile patrol samtang nagpahigayon og security convoy sa Brgy. Napangan, Don Victoriano, niadtong Biyernes, Pebrero 13, 2026.
Giila sa kapulisan ang mga namatay nga sila si PSSg Vilcon Tuyan Macabugto, Pat. Neljie Arsula Marban, Pat. Rudilyn Ruiz Pacut ug Pat. Louel Geraga Cordova.
Subay sa report, ang mga biktima kauban ang tulo ka empleyado sa Provincial Tourism Office alang sa security convoy sa kalihokan sa Binibining Pilipinas sa maong dapit. Samtang naglawig paubos sa dalan sa Barangay Napangan, nawad-an og kontrol ang driver sa sakyanan nga miresulta sa pagkahulog niini sa pangpang.
Dali nga gidala sa balay tambalanan ang ubang mga sakay nga naluwas sa insidente.
Kasamtangan, nagpadayon pa ang imbestigasyon sa mga otoridad aron sayron ang eksaktong hinungdan sa maong aksidente. Nipadayag na usab og pahasubo ang lokal nga kapulisan ug mga opisyal sa probinsya ngadto sa pamilya sa mga biktima.