Mitahan na balik sa sabakan sa gobyerno pinaagi sa 89th Infantry Battalion sa Philippine Army ang upat ka kumander kauban ang 189 ka miyembro sa New People’s Army (NPA) ug ilang mga pamilya sa Barangay Butong, Quezon, Bukidnon, kagahapong adlawa, Agosto 8, 2025.
Dala niini ang kapin 72 ka nagkadaiyang armas, lakip ang lima ka granada ug usa ka landmine, nga gisalibay sa kasundalohan isip ilhanan sa hingpit nga pagsurender niini.
Sumala ni Captain Aries Dentista, tigpamaba sa 89th Makatao Infantry Battalion, kini nga inisyatiba nahimo pinaagi sa hugot nga koordinasyon sa lokal nga kagamhanan ug kasundalohan, subay sa panagsabot tali sa mga buot mosurender ug sa militar.
Lakip sa misurender ang upat ka kumander sa Northern Mindanao Sub-Regional Command nga gikan sa San Fernando, Valencia City, Kibawe ug Quezon.
Nanguna si Senador Juan Miguel Zubiri, isip guest speaker, sa pag-apod-apod og P5,000 ug 10 kilos nga bugas matag indibidwal, inubanan sa mainit nga pagdawat sa ilang pagbalik sa sabakan sa gobyerno.
Nanawagan usab si Dentista, sa nahibilin pang mga rebelde nga talikdan na ang kahasol sa kabukiran, ug yakmon ang bag-ong kinabuhi nga puno sa kalinaw, panaghiusa, ug paglaom alang sa mas malambuong probinsya.