Gipaubos na sa inquest proceedings sa City Prosecutor’s Office sa Malaybalay City, Bukidnon ang upat ka Chinese nationals ug 20 ka local workers nga nadakpan tungod sa gikaingong illegal nga kalihokan sa pagmina.
Ang mga suspek gi-endorso sa National Bureau of Investigation–Region 10 alang sa pormal nga pagsusi sa kaso.
Sumala sa NBI-10, unang nadakpan ang mga suspek atol sa operasyon sa mga ahente sa NBI ubos sa koordinasyon sa Libona Municipal Police Station, human masakpan sa aktwal nga kalihokan sa usa ka minahan sa Barangay Gango, Libona, Bukidnon.
Gikaingon nga wala’y klaro ug balidong permit ang maong operasyon, hinungdan nga gi-intervene gilayon kini sa mga otoridad.
Matud pa ni NBI-10 Executive Officer for Operations, Special Investigator Nolan Gadia, nasuta nga ang upat ka Chinese nationals wala’y igo ug hustong legal nga mga papeles, hinungdan gi-andam usab ang laing posibleng kaso nga ipasaka batok kanila sumala sa resulta sa imbestigasyon.
Sa maong operasyon, narekober sa NBI ang nagkalain-laing kagamitan nga gigamit sa illegal nga pagmina, lakip na ang mga nahabwa nga minerals.
Base sa inisyal nga datos, mukantidad sa kapin kon kulang P30 milyones ang narekober nga mineral ug ekipo.
Padayon pa ang imbestigasyon aron matino ang tanang responsable ug masuta kung aduna pay laing nalambigit sa maong operasyon.