35 ka indibidwal ang nadakpan samtang dul-an P2.5 milyon ang kantidad sa iligal nga droga nga nakumpiska atol sa usa ka semana nga operasyon sa Bukidnon Police Provincial Office (BPPO) ubos sa Simultaneous AntiCriminality Law Enforcement Operation o SACLEO nga nagsugod niadtong Oktubre 24 hangtod Nobyembre 3, 2025.
Sa eksklusibong pakighinabi kang PCPT Sheila Joy Jangad, tigpamaba sa Bukidnon Police Provincial Office gipasabot niyang padayon ang mga operasyon aron mapakusgan ang kampanya batok sa iligal nga droga, illegal fire arms ug uban pang krimen sa tibuok Bukidnon.
Base sa datos sa kapulisan, 29 ka anti-drug operations ang gihimo sa nagkalain-laing lugar sa probinsya. Sa operasyon batok sa iligal nga armas, duha ang nadakpan ug 29 ka pusil ang nakumpiska.
Sa anti-smuggling operations, adunay 12 ka operasyon kontra sa iligal nga sigarilyo ug 41 ka wanted persons ang nadakpan sa nagkalain-laing lungsod ug syudad sa Bukidnon.
Saysay pa ni PCPT Jangad nga magpadayon ang ilang mga kalihokan aron mapugngan ang pagtaas sa kriminalidad ug mapalig-on ang kalinaw ug seguridad sa probinsya.