Namatay ang laing duha ka tao human nahulog ang construction crane sa usa ka highway sa Samut Sakhon, usa ka suburb sa Bangkok, usa lamang ka adlaw human sa laing aksidente sa crane sa amihanan-sidlakang Thailand nga nakapatay sa 32 ka tao.
Makita sa bidyo gikan sa lugar nga nahitaboan sa aksidente nga ang crane nahulog sa highway, diin nahulog padulong sa mga sakyanan lakip na ang mga debris nga naglupad sa palibot sa lugar.
Sa miaging adlaw, usa ka crane sa Nakhon Ratchasima ang nahulog sa nag-andar nga tren, nga nakaangol sa kapin sa 60 ka mga tao.
Ang maong duha ka mga proyekto gidumala sa Italian-Thai Development, usa sa pinakadako nga kompanya sa konstruksyon sa Thailand.
Gikataho nga sa miaging pito ka tuig, gibanabana nga 150 ka mga tao ang nangamatay sa mga aksidente sa usa ka road improvement project gikan sa Bangkok paingon sa habagatan sa nasud.
Matud pa sa Punong Ministro sa Thailand nga si Anutin Charnvirakul, nga susihon sa mga otoridad ang gikaingon nga pagpasagad sa konstraksyon human sa aksidente kaniadtong Miyerkules.
Gipahibalo usab sa State Railway sa Thailand ang mga plano nga magpasaka og kaso batok sa Italian-Thai Development.
Ang kompanya usab ang responsable sa usa ka skyscraper sa Bangkok nga nahugno kaniadtong Marso tungod sa linog, ang unang building sa syudad nga nahugno sa maong insidente.