Nakaangkon og samad dinunggaban ang usa ka 32-anyos nga lalaki human kini giatake sa kaugalingong bayaw kagahapong adlawa takna alas 10:30 sa gabii sa Purok New Ilocos, Dalwangan, Malaybalay City.
Base sa report, ang 46-anyos nga suspek daling nadakpan sa mga sakop sa BPSO-Dalwangan human kini naabtan sa akto nga gidunggab ang biktima gamit ang kutsilyo ug bolo.
Sumala sa inahan sa biktima, ang suspek miabot sa ilang panimalay nga lango sa ilimnong makahubog ug gikuha ang iyang menor de edad nga anak, apan sa dihang mipauli ang bata nga naghilak, mibalik ang suspek nga armado na ug pugsanon nga misulod sa balay aron atakehon ang biktima nga naglingkod sa sala.
Nakaangkon ang biktima og mga samad sa dughan ug bukton,diin gilayon gidala sa Bukidnon Provincial Medical Center (BPMC) alang sa tenyong medikal ug karun anaa na kini sa stable nga kondisyon, samtang ang suspek gidala na sa Malaybalay CPS alang sa tukmang disposisyon ug pagpasaka sa tukmang kaso batok niini.