Nagpatuman og manhunt operation ang kapulisan sa Impasugong, Bukidnon aron pangitaon ug madakpan ang suspitsado nga nalambigit sa usa ka pagpanigbas nga nahitabo niadtong Abril 2, 2026, alas 4:00 sa hapon sa Purok 1, Sitio Ilignan, Barangay Guihian.
Ang biktima, usa ka 30-anyos nga lalaki nga residente sa Sagpang, Barangay Maluko, Manolo Fortich. Gidala gilayon kini sa Bukidnon Provincial Medical Center (BPMC) sa San Miguel pinaagi sa Guihian Rescue Team.
Nakaangkon kini og samad tinigbasan sa wala nga bahin sa apapangig, apan karon anaa na sa luwas ug stable nga kondisyon.
Base sa inisyal nga imbestigasyon, nahitabo ang insidente sulod sa usa ka bilyaran diin nagkaatubang og mainitong panaglalis ang biktima ug ang 65-anyos nga suspitsado.
Dugang pa, gikaingong gisuntok sa biktima ang suspek, hinungdan nga miadto kini sa iyang umahan aron mokuha og sanggot. Pagbalik, kalit niini nga gitigbas ang biktima sa makadaghan nga higayon ug dayon miikyas paingon sa wala pa masuta nga direksyon.