Misaka sa tulo ang ihap sa nakabsan og kinabuhi tungod sa managlahing insidente sa pagpangdunggab ning lalawigan sa Bukidnon, nga naglakip sa mga insidente sa Cabanglasan, Impasugong, ug Manolo Fortich.
Sa Purok 3, Barangay Poblacion, Cabanglasan, usa ka lalaki nga ginganlan og “Cardo” ang namatay human gidunggab sa bana sa iyang kabit, samtang samdan ang asawa sa suspek. Matud sa taho, selos ang giilang motibo sa maong krimen.
Samtang sa Brgy. Alae, Manolo Fortich, usa ka 68-anyos nga senior citizen ang napatay human gidunggab samtang nangolekta og pasaw sa baboy, ug nasuta nga adunay panaglalis bahin sa yuta nga giatiman sa biktima tali sa suspek.
Sa Sitio Intabas, Barangay La Fortuna, Impasugong, usa usab ka lalaki ang napatay human gitigbas sa iyang duha ka uyuan bag-ohay lamang tungod sa panaglalis samtang nag-inom, diin nadakpan ang mga suspetsado sa Villanueva, Misamis Oriental.
Ang biktima nakaangkon matud pa og grabeng samad, lakip na ang defensive wounds, nga nagpamatuod sa paningkamot sa pagpanagang sa brutal nga binuhatan.
Sa maong mga insidente, nagpatuman na ang kapulisan og hot pursuit operations sa mikyas nga indibidwal ug giandam na ang pagpasaka og mga tukmang kaso batok sa mga nadakpan.