Patay ang tulo, lakip na ang usa ka menor-de-edad, atol sa duha ka manglahing aksidente sa lalawigan sa Bukidnon.
Natigayon ang maong panghitabo sa lungsod sa Damulog ug Baungon kagahapong adlawa.
Ang unang insidente, patay ang drayber sa usa ka passenger van human kini mabangga sa trailer truck sa Purok 3, Quarry, Barangay Sampagar, Damulog.
Giila ang biktima nga si Alfredo Lagrimas, hingkod ang pangidaron ug residente sa Barangay Sinayawan, Valencia City.
Sakay sa van ang unom (6) ka naangol nga mga pasahero diin pulos residente sulod sa Monastery of Transfiguration sa San Jose, Malaybalay City samtang paingon kini sa habagatang direksyon sa Carmen, North Cotabato, samtang ang trailer truck gikan sa laing direksyon pa-Kibawe.
Sa pikas bahin, ang ikaduhang insidente, patay ang duha ka tawo, lakip na ang usa ka menor-de-edad, human sa aksidente sa motorsiklo sa Provincial Road, Purok-2, Barangay Lingating, Baungon.
Base sa imbestigasyon, gisalmutan sa duha ka motorsiklo ang maong insidente nga gimanehuan sa usa ka 30-anyos nga collector uban sa iyang 27-anyos nga babaye nga backrider, ug usa ka Raider nga kolor itom nga gimaneho sa usa ka menor-de-edad nga lalaki gikan sa Barangay Danatag.
Gikaingong nagikan sa usa ka direksyon ang duha ka motorsiklo, sa dihang misenyas ang unang drayber nga moliko sa wala, apan nabanggaan kini sa nagsunod nga motorsiklo sa usa ka menor-de-edad.
Gumikan sa impact, natumba ang mga motorsiklo ug nahulog ang mga sakay.
Gidala pa sa ospital ang drayber ug ang iyang backrider, apan gideklarang dead on arrival ang babaye, samtang patay dayon sa mismong lugar ang menor-de-edad nga drayber.
Anaa karon sa kustodiya sa Baungon Municipal Police Station ang duha ka motorsiklo alang sa tukmang disposisyon.
Samtang padayon pa ang imbestigasyon sa maga otoridad kabahin sa duha ka insidente.