Gitaho sa Bureau of Immigration (BI) ang pagkasikop sa tulo ka mga gidudahang pekeng Pilipino sa lain-laing mga operasyon nga gihimo sa Pampanga.
Gipahibalo ni BI Commissioner Joel Viado ang pagkadakop sa usa ka lalaking Chinese national nga nailhan nga si Lin Yi, 35-anyos, niadtong Hulyo 31 sa usa ka business establishment nga nahimutang sa Pandan Road, Dakbayan sa Angeles, Pampanga.
Ang operasyon gibase sa usa ka anonymous nga reklamo batok kang Lin, nga nadiskobrehang nagpadagan og usa ka carwash nga negosyo sa maong lugar.
Subay sa reklamo, si Lin naggamit matud pa og identidad nga Pilipino alang sa mga transaksiyon sa negosyo niini. Nadawat sa BI ang kopya sa birth certificate ni Lin nga late registered ug kadudahan, lakip na ang iyang Philippine identification card ug official receipt sa driver’s license dinhi sa nasud.
Nadiskobrehan usab nga si Lin adunay working visa nga balido hangtod 2027 gamit ang iyang Chinese nga pagkatawo. Samtang, sa usa ka residential unit sa Sarmiento St., Malabanias, Dakbayan sa Angeles, gidakop si Yan Yize, 30-anyos.
Gidakop usab si Wang Jiangyi, 55-anyos, sa Brgy. Panipuan, Mexico, Pampanga.
Sumala sa mga intelligence unit sa goberno, ang duha naggamit usab og peke nga identidad isip mga Pilipino ug adunay late-registered Philippine birth certificate, BIR TIN ID, ug business registration gikan sa Securities and Exchange Commission.
Gituohan nga konektado ang mga dinakpan sa usa ka construction ug development corporation nga gigamit isip paagi sa ilang mga kalihokan sa pag-angkon og yuta sa nasud.