Tulo ka dagkong selebrasyon nga kalihukan ang dungan nga pagasaulugon sa lalawigan sa Bukidnon karong umaabot nga bulan sa Marso.
Nunot niini, hugot ang pagpangandam sa mga lokal nga panggamhanan sa Bukidnon sa pakigtimbayayong sa mga ahensya aron hingpit nga ipahigayon ang maong mga kalihukan.
Sumala ni Justino Roy B. Santonino, ang Traffic Operations Officer I, gihatag na ang hingpit nga suporta alang niining mga kalihukan nga magsugod sa Marso 18 alang sa pag-abli sa Northern Mindanao Regional Athletic Association (NMRAA), sundan sa pag-abli sa prestihiyosong Kaamulan Festival sa Marso 19, dungan sa pagsaulog sa Charter Day sa siyudad sa Malaybalay.
Samtang sa bahin sa NMRAA 2026, aron masiguro ang hapsay nga dagan sa trapiko ug seguridad, ang lokal nga kagamhanan nakigtimbayayong sa nagkalain-laing ahensya, lakip na ang Department of Education (DepEd), alang sa mga sakyanan nga tugutan makasulod sa mga venue.
Gawas sa mga regular nga sakyanan, gibana-banaang moabot sa kapin libo ka mga sakyanan ang tugutang makasulod sa Sports Complex ug 90 ka VIP vehicles ang gipangandaman og espesyal nga parking spaces aron masiguro nga dili mababagan ang dagan sa trapiko samtang gipahigayon ang maong mga mabulukong aktibidad sa probinsya.