Malipayong gidawat ug giabi-abi ni Pangulo Ferdinand “Bongbong” Marcos Jr. sa Malacañang ang mga representante sa Copenhagen Infrastructure Partners (CIP), diin usa ka bantugang Danish investment firm nga nagpunting sa renewable energy ug sustainable infrastructure projects.
Sa ilang panagtagbo, gipahibalo sa CIP ang plano nga magpuhunan og $3 bilyon sa Pilipinas alang sa mga proyekto sama sa offshore wind energy, green power, ug uban pang modernong imprastruktura.
Nagpasalamat si PBBM sa kompanya sa ilang pagsalig sa potensyal sa Pilipinas ug sa suporta niini sa programa nga “Build Better More.”
Sumala sa Pangulo, ang maong puhunan makahatag og liboan nga trabaho, makapalig-on sa renewable energy sector, ug makapadasig sa kalamboan sa ekonomiya samtang nagpanalipod sa kinaiyahan.
Matud ni Palace Press Officer Undersecretary Claire Castro, kini nga lakang nagpakita nga kumpyansa o adunay pagsalig ang mga langyaw nga mamuhunan sa Pilipinas ug laumang mudagsa pa ang ubang nasud ubos sa direksyon sa administrasyon sa natad sa enerhiya.