Tingkagol karon sa selda sa kapulisan ang usa ka 23-anyos nga dalaga human malampusong nasikop sa gipahigayon nga joint buy-bust operation sa Purok 3, Barangay Lumbo, Valencia City, Bukidnon.
Giila ang suspek nga si alyas “Nika,” kinsa gikonsiderang usa ka Newly Identified Drug Personality. Atol sa operasyon, nakuha gikan sa posisyon sa suspek ang gibanabanang 5.1 gramos sa gidudahang shabu nga dunay market value nga mokabat sa Php 34,680.00.
Gawas sa illegal nga droga, nakuha usab ang usa ka cellphone, P500 nga cash, ug usa ka plastic container. Ang imbentaryo sa mga ebidensya gipahigayon mismo sa dapit diin nasikop ang suspek sa presensya sa mga opisyales sa barangay.
Sa pagkakaron, anaa na sa kustodiya sa Valencia City Police Station ang suspek samtang giandam na ang kasong pagsupak sa R.A. 9165 kon Comprehensive Dangerous Drugs Act of 2002.