Usa ka “child prodigy” ang nakapahibulong sa kalibutan sa snooker ug billiards human nakatala og duha ka Guinness World Records bisan duha pa lang ka tuig ang edad.
Si Jude Owens, nga karon giila na sa mga professional players, unang nakarekord isip pinakabata nga nakahimo og snooker double pot sa edad nga 2 ka tuig ug 261 ka adlaw.
Wala pa diha natapos ang iyang talagsaong abilidad kay sa wala pa siya moabot sa ikatulong tuig, nakuha usab niya ang rekord isip pinakabatang nakahimo og pool bank shot.
Sumala sa iyang amahan nga si Luke, nagsugod si Jude sa usa ka gamay nga lamesa apan dayon namatikdan ang iyang talagsaong talento.
Bisan kinahanglan pa siyang motungtong sa lingkuranan aron maabot ang regular-sized nga lamesa, kabisado na niya ang mga komplikadong tira nga lisod pa gani buhaton tandi sa daghang hamtong nga player.