29-anyos nga lalaki nag-amok sa Kibawe, napusilan human misukol sa mga otoridad

Nakaangkon og samad pinusilan ang usa ka 29-anyos nga lalaki human kini misukol sa ototidad Kibawe Public Terminal, Bukidnon niadtong Pebrero 21, 2026, takna alas 12:50 sa kadlawon.

Naigo sa paa bahin ang suspek aron mapugngan ang pag-atake sa dihang misulay kini og dunggab sa usa ka pulis nga misaway sa suspek samtang naghasi sa maong lugar.

Sa wala pa ang insidente, nag-amok matud pa usab ang suspek sa Kibawe Public Market diin nanglabay og bato sa mga lumalabay ug nangbuak og mga botelya sa atubangan sa usa ka tindahan.

Gidala gilayon ang suspek sa Bukidnon Provincial Hospital sa Kibawe alang sa tambal ug karon anaa na sa stable nga kondisyon samtang giandam ang kasong direct assault batok kaniya.