Nagsira ang 28 ka gasolinahan sa Northern Mindanao base sa opisyal nga datos nga gipagawas Monitoring of Oil Crisis gikan sa Philippine National Police Regional Office 10 (PRO-10) kagahapong adlawa.
Sa maong report, mikabat sa 837 ka gasolinahan ang na-monitor sa tibuok rehiyon, diin ang Bukidnon adunay 276 ka estasyon ug 19 niini ang gisirad-an, samtang adunay 2 sa Camiguin, 2 sa Lanao del Norte, 4 sa Misamis Oriental, ug 1 sa Iligan City.
Gipakita usab sa datos nga walay nadawat nga reklamo ug walay kaso nga napasaka kalabot sa hoarding, profiteering o overpricing sa tanang lugar nga gi-monitor.
Atol sa usa ka press conference nga gipahigayon sa PRO-10 kabahin sa accomplishment report sa kapulisan sa rehiyon, gibutyag ni PBGen. Cristopher N. Abrahano, ang Regional Director-Police Regional Office-X, nga nagpadayon ang hugot nga pagmonitor sa mga otoridad aron masiguro ang husto nga suplay sa petrolyo ug pagsunod sa regulasyon taliwala sa gitawag nga oil crisis sa rehiyon pinaagi sa pakigtimbayayong sa Department of Energy.
Gidugang sa direktor nga ang maong pagsira sa mga gasolinahan walay kalabotan sa hoarding apan nunot sa kawad-on sa suplay sa lana.