26-anyos nga lalaki, patay human mabangga sa poste ang gimanehoang motorsiklo sa Maramag Bukidnon

Nakabsan sa kinabuhi ang usa ka 26-anyos nga lalaki human kini nalambigit sa usa ka vehicular accident sa Sayre Highway, Purok 1, Base Camp, Maramag, Bukidnon ning entadra sa bulan, Marso 1, alas-2:55 sa kadlawon.

Matud sa imbestigasyon, kusog nga nagpadagan ang biktima sa gimanehoang motorsiklo padulong sa Purok 2 sa dihang nawad-an kini og kontrol tungod sa sobra nga kaspas ug kangitngit sa dalan.

Gumikan sa kakusog sa dagan, nibangga ang motor sa sementadong bahin sa dalan ug nalahos sa usa ka concrete post nga maoy hinungdan sa grabeng samad sa tibuok lawas sa drayber.

Gidala pa sa rescue team ang biktima ngadto sa Bukidnon Provincial Hospital sa Maramag, apan gideklara kining dead on arrival sa attending physician.