Gihulagway sa usa ka legal expert nga sayo pa ang nahimong lakang ni Vice President Sara Duterte sa pagdeklara sa iyang tinguha alang sa 2028 presidential elections.
Kini ang gibutyag ni Atty. Oscar S. Moreno, usa ka Law Professor atol sa exclusibong pakighinabi niini sa Bombo Radyo diin matud pa niini nga wala na niini gikatingala ang maong deklarasyon sanglit si Duterte ang giisip nga frontrunner isip ikaduhang labing taas nga opisyal sa nasud.
Bisan pa man, gipasabot sa experto nga ang maong deklarasyon mahimong konektado sa impeachment cases batok sa Bise Presidente. Matud pa niini, posible kining gigamit sa pipila ka kalaban niini sa pulitika aron babagan ang iyang kandidatura.
Dugang niini, gihisgotan usab ni Atty. Moreno ang nakatakdang “confirmation of charges” batok ni kanhi President Rodrigo Duterte sa sunod semana kalabot sa mga akusasyon sa crimes against humanity. Kini nga proseso gilauman nga maghatag og mas klaro nga hulagway sa publiko bahin sa mga seryosong violations nga giatubang sa kanhi Presidente sa nasud.