20 ka importers gihunong; P3.78B Smuggled Goods nasakmit sa DA

Gihunong na sa Department of Agriculture (DA) ang pakigtransaksyon sa kapin 20 ka importers nga nalambigit sa pagpangsmuggle sa mga produkto sa agrikultura ug pangisda.

Ang maong mga kompanya gilakip sa lista sa mga gidili human makumpiskar ang mga smuggled goods nga nagkantidad og P3.78 bilyon sulod sa 17 ka buwan, base sa taho nga gisumite sa DA ngadto sa Senate agriculture committee nga gipangulohan ni Senador Francis Pangilinan.

Gibutyag ni Agriculture Secretary Francisco Tiu Laurel Jr. nga ang Inspectorate and Enforcement Office sa ahensya nakapahigayon og 182 ka operasyon gikan Enero 2024 hangtod Hulyo 2025 aron matultol ug mapugngan ang pagpangsmuggle nga nagdala og kadaot sa lokal nga produksyon ug sa mga mag-uuma.