Nakabsan sa kinabuhi ang duha ka bata human gipamusil sa usa ka Catholic School sa Minneapolis.
Natigayun ang insidente samtang nagpahigayon og misa Annunciation Catholic School, diin gibabagan sa suspetsado nga giilang si Robin Westman ang duha ka pultahan sa tulonghaan ug walay puas kining namusil.
Miabot sa 17 ka mga indibidwal diin kasagaran mga bata ang nangaangol ug sa pagkakaron gidala na kini sa balay tambalanan.
Ang mga batang nakabsan sa kinabuhi nag-edad sa unom ug otso anyos.
Human sa pipila ka minuto, nakaplagan sa mga otoridad ang patay nga lawas suspetsado duol sa eskwelahan.
Hugot nga nagtuo ang mga otoridad nga maayo nga giplano sa suspetsado ang pagpamusil ug gitun-an ang mga kalihokan sa maong tulonghaan.
Tungod sa insidente, gimandoan ni US President Donald Trump nga ibutang sa half-staff ang bandila sa America nga anaa sa mga opisina sa gobyerno hangtod sa adlaw’ng Domingo.
Hilabihan usab ang kasubo ni Pope Leo XIV sa dihang nasayran niini ang panghitabo.
Matud ni Vatican Secretary of State Pietro Parolin, gipaabot niini iyang pagbati sa kasubo sa mga kabanay sa biktima.
Dugang pa niini, gilakip usab niya sa pag-ampo ang mga biktima ingon man ang mga first responder ug mga alagad sa simbahan sa maong tulonghaan.