Gikumpirma ni Department of Transportation (DOTr) Secretary Vince Dizon nga wala tuyoa ang nahitabong insidente sa NAIA Terminal 1 sa Pasay City, base sa inisyal nga imbestigasyon ug kuha CCTV footage.
Matod niya, adunay pasaherong gihatud ang drayber nga giilang si Leo Gonzales sa wala pa nahitabo ang trahedya.
Gikumpirma usab kini sa drayber ug mitug-an nga nataranta lamang siya human adunay sakyanang mitabok ug inay nga preno ang tamakan, aksidente niining natamakan ang selinyador.
Sa pagkakaron, anaa na sa kustodiya sa Philippine National Police (PNP) ang drayber.
Napamatud-an nga miresulta sa dakong kadaut ang insidente diin duha ang namatay, lakip na ang usa ka 4-anyos nga batang babaye, samtang tulo ang samaran.
Padayon nga gipang-ayo sa ospital ang mga biktima nga nakadawat og samad ug bali sa ilang lawas.
Gisiguro ni Dizon nga ang kompanya ang motubag sa tanang gastong medikal sa mga nasamdan ug sa lubong sa mga namatay.
Nanawagan si Dizon sa publiko nga respetohon ang mga biktima ug likayan ang pag-post sa mga sensitibong video o hulagway sa insidente sa social media alang lang sa kadaghan sa views.