Gipahibalo sa Philippine Embassy sa Abu Dhabi nga adunay duha ka Pilipino ang nalakip sa 25 ka mga tawo nga giingong gidakop sa United Arab Emirates (UAE) tungod sa pag-post og mga hulagway ug video sa social media bahin sa mga airstrikes ug air defense interceptions sa Dubai.
Sa pagkakaron, hugot nga nag-monitor ang embahada ug nakig-alayon sa mga awtoridad alang sa opisyal nga kumpirmasyon, dungan sa pagpahayag sa ilang respeto sa soberanya ug balaod sa UAE mahitungod sa national security ug cybersecurity.
Tungod niini, giawhag ang mga Pinoy sa maong nasud nga mahimong responsable sa social media, likayan ang pagkuha og mga sensitibong video o hulagway, ug mosalig lamang sa mga opisyal nga anunsyo gikan sa gobyerno sa UAE aron malikayan ang pagpakaylap og sayop nga impormasyon.