Samaran ang duha ka lalaki human sila gipaulanan og bala sa usa ka wala mailhing suspek sulod mismo sa ilang panimalay sa Brgy. Balaoro, Kadingilan, Bukidnon, niadtong milabayang adlaw, pasado alas-9:55 sa gabii.
Base sa report sa Kadingilan Municipal Police Station, anaa sa sulod sa ilang balay ang mga biktima sa dihang ilang namatikdan ang usa ka kaduda-dudang tawo nga nagpaniid sa gawas. Sa pagtan-aw nila sa bintana, gisigaan sa usa sa mga biktima ang palibot gamit ang flashlight diin iyang positibong naabtan ang armado nga suspek.
Dihadiha nga gipaulanan og bala sa suspek ang mga biktima sa wala pa kini mikalagiw padulong sa wala masayring direksyon. Ang unang biktima, kinsa usa ka hamtong, naigo sa iyang wala nga bukton, samtang ang ikaduhang biktima naigo usab sa wala nga bahin sa iyang tiyan. Dali nga gidala ang duha ka samran sa balay tambalanan alang sa dinaliang pagtambal.
Sumala sa kapulisan, ang mga biktima anaa na sa luwas nga kahimtang apan padayon pang gina-obserbahan sa mga doktor. Sa pagkakaron, gipakusog sa Kadingilan MPS ang gihimong hot pursuit operation ug lawom nga imbestigasyon aron mailhan ug madakpan ang responsable sa maong pagpamusil.