Nakabsan og kinabuhi ang duha ka indibidwal atol sa natigayong insidente nga pagbangga sa duha ka motorsiklo sa Purok-8, Dabong-dabong, Barangay Mailag, Valencia City, ninglalawigan.
Giila ang mga biktima nga si Richard Capudag Estrebor, 32 anyos, minyo ug residente sa Purok-8, Halapitan, San Fernando, nagmaneho sa usa ka XRM 125 diin gideklarang wala nay kinabuhi sa mismong pagkaaksidente.
Ug si Kennith Jun Polistico Galban, 29 anyos, ulitawo ug residente sa Purok-1, Nasuli, Barangay Bangcud, Malaybalay City, nga nagmaneho sa usa ka NMAX.
Gidala pa kini sa tambalanan, apan human lamang sa pipila ka minuto gideklara na usab kining wala nay kinabuhi.
Sa inisyal nga imbestigasyon, nasuta nga nagpadulong sa managlahi nga direksyon ang duha ka motorsiklo.
Gikaingon nga misulay sa pag-overtake ang XRM nga gimanehoan ni Estrebor, hinungdan sa direktang panagbangga niini sa usa pa kamotorsiklo.
Samtang ang duha ka motorsiklo nga nalambigit sa aksidente gidala na sa kustodiya sa Valencia City Police Station.
Nagpadayon usab ang imbestigasyon sa maong aksidente.
Kahinumdoman nga nahitabo kini kagahapon sa gabii, Setyembre 27, 2025.