Nagmalampuson ang pagpatuman sa Dugong Bombo 2025 nga nakatala og 182 ka malampusong blood donations atol sa one-day bloodletting activity sa programa sa Bombo Radyo Philippines nga “Dugong Bombo: A Little Pain, A Life to Gain,” nga gipahigayon sa Bukidnon State University Gymnasium, kagahapong adlawa, isip kabahin sa nasudnong programa sa Bombo Radyo Philippines.
Nagkahiusa sa maong adbokasiya ang Philippine Red Cross–Bukidnon Chapter, Bukidnon State University, mga ahensiya sa kagamhanan, law enforcement personnel, ug ubang sektor aron masuportahan ang paghatag og dugo nga makatabang sa mga pasyente sa tibuok nasud ug department of Health.
Giluwas sa kampanya karong tuiga ang 4,657 ka blood bags, ekwal sa 2,096 litros o 10 ka drum nga dugo, nga gihatag sa partner blood banks aron matubag ang panginahanglan sa mga pasyente nga nagkinahanglan ug dali nga blood transfusion.
Si Ralph Peter Ocab, unang blood donor sa kalihukan, mipasabot sa Bombo Radyo Malaybalay nga malipayong misalmot siya kay gawas sa pagtabang sa uban, makamaayo usab kini sa lawas ug makatabang sa sirkulasyon sa dugo.
Samtang si SGT. Jhelia Ann Palomeno sa 8th Infantry Battalion mipadayag nga hapsay ang proseso sa pagdonar, ug bisan bag-o pa siya nakadonate og dugo, gibasehan sa medical team ang iyang hemoglobin nga midala sa pagpadayon sa proseso. Giklaro usab niini nga usa kini ka maayong kasinatian.
Sa laing bahin, si Dr. Leonardo M. Galang Jr., Medical Officer III sa Bukidnon Provincial Medical Health Center, nagpasalamat sa daghang Bukidnon State University students ilabi na sa ROTC ug NSTP, nga boluntaryong misalmot sa pagpa-check ug pagdonar sa dugo. Iyaha pang gipasalig nga positibo ang kabatan-onan sa kalihukan ug hapsay ang implementasyon sa programa tungod sa ilang tinguha nga makatabang sa komunidad.
Sa kataposan, nagpadayon ang Dugong Bombo sa misyon nga magluwas og kinabuhi pinaagi sa kada patak nga dugo nga gihatag sa boluntaryong mga donor.