Gipaniguro sa lokal nga kagamhanan sa Valencia City nga labing sayo sa tuig 2026 mahuman na ang programang relokasyon alang sa labing apektadong pamilya sa pagbaha sa Valencia City.
Sa eksklusibong pakighinabi sa Bombo Radyo Malaybalay kang Jun M. Galario, Jr., kanhi City Mayor, Consultant, ug kasamtangang tigpamaba sa LGU Valencia City, gipahibalo niini nga pipila ka semana na lamang ang gikinahanglan aron masugdan ang pag-plotting sa mga luna alang sa relokasyon.
Gibutyag niini nga adunay 181 ka apektadong pamilya nga naigo sa bug-os nga kadaut tungod sa pagbaha, diin kini ang una nga prioridad sa programang relokasyon.
Dugang pa ni Galario, alang sa mga lugar nga partially damaged, aduna usab gigahin nga pondo ug programa.
Samtang nagpahimangno usab ang lokal nga kagamhanan sa mga residenteng anaa sa flood prone area nga mamahawa na ug makig-alayon sa mga pasidaan sa otoridad aron malikay sa posibleng mga kadaot ug peligro.