Gibutyag ni Senate President Pro Tempore si Panfilo Lacson ug chairman sa Senate Blue Ribbon Committee, nga bukas gihapon ang komite sa pagpaminaw sa 18 ka indibidwal nga nagpailang mga kanhi sundalo nga nag-angkon nga sila maoy nag-deliver sa giingong P805 bilyon nga kickbacks gikan sa mga flood control projects ngadto sa pipila ka taas nga opisyal sa gobyerno, apan kinahanglan una nilang isakto ang ilang mga pahayag aron mahimong katuohan.
Gipasabot ni Lacson nga kon ang naunang mga pahayag sa grupo nahulog sa gitawag nga “realm of possibilities” o makatarunganon paminawon, dugay na unta silang giimbitar sa komite aron motestigo sa pagdungog.
Matud pa sa senador, dili sirado ang pultahan sa Blue Ribbon Committee alang sa 18 ka indibidwal, apan kinahanglan nga usbon ug klaruhon nila ang ilang mga pahayag aron dili mahimong magubot ang proseso sa pagdungog.
Gitumong sa senador ang naunang alegasyon sa grupo nga miabot sa P805 bilyon ang kantidad sa cash nga giingong gipanghatag isip kickbacks gikan sa mga flood control projects ngadto sa mga taas nga opisyal sa gobyerno, lakip si kanhi House Speaker Martin Romualdez.
Matud ni Lacson, lisod tuohan ang maong kantidad, dili lamang tungod sa kadako niini kundi tungod usab sa kalisod sa pagdala ug pag-apod-apod sa ingon kadako nga salapi.
Kahinumduman usab nga una nang gitambagan ni Lacson si Levito Baligod, ang abogado nga nagpresentar sa 18 ka kanhi sundalo, nga susihon ug itul-id ang ilang mga affidavit.
Sumala sa senador, mahimo nilang bawi-on o usbon ang pipila ka bahin sa ilang mga pahayag kung adunay mga detalye nga dili husto.
Gipasabot usab niya nga ang importante mao nga maduol sa tinuod ug realistiko nga kahimtang ang ilang mga testimonya aron dili masayang ang oras sa komite sa mga posibleng bakak nga alegasyon.
Dugang pa ni Lacson nga kung matul-id ang mga affidavit ug mahimong mas katuohan ang ilang mga pahayag, andam siyang magpatawag og pagdungog aron mapaminaw ang ilang mga testimonya sa komite.